prose · August 22, 2026
Mangṭha le, Pate!
Heti zâwng hian “Mangṭha le” tih ṭawngkam hi ka hman ka ring ngai lo mahse, a loh theih lohna in min nang ta si a nih hi.
Han thlir lêt duai ila, kum 2012 khan ka pa bulah hian,”Pa, ‘Pate’ ti a koh tur hi ka duh ve e,” ka tia, ka Pa chauh ni lo, Pathian paw’n ka duhzawng chu a lo ngaithla ve a ni ang e Sihphir lam aṭangin ka pa cousin chu a zirna chhunzawm turin kan chhungkua min rawn zawm ve ta hlauh mai. “Pate” ti a koh tur ka han nei ve ta chu ka lawmzia kha aw! Mahse, hetih lai hian ka ko zak tlat pek a.
Hun a kal leh deuh a kei pawh Pathian zârah Class-X ka pass hnu chuan Lunglei lamah Higher chhunzawm turin kan in pui lamah ka insawn phei ve ta a. Ka Patea nen pawh han inkawmna hun ṭha zâwk te kan nei thei a. Ka Patea hi ka tân he’ng ka hun tawn hrang hrangah hian ka tân ṭhian ṭha nih a tling a Pa ṭha tak nih a tling em em a mahse, tun hnuah ka hrethiam pha ve chauh chu a ni si a.
Guitar ka han atchilh tak tak kha chu!
Atchilh tawh pe na thei deuh mai hi ka ni a. Kum 2020 kha ka ât vanglai a nia ṭhian kâwm loin chhungte te bulah pawh hun hmang tam chuang si lo khan pindan lamah ka Guitar nen hian kan inkâwm nilêng ṭhak ṭhak mai kha a nia. Chuta kârah ka inla MetalHead tel ve khanglang a chhûngte ṭhenkhat leh ka ṭhiante ṭhenkhat phei kha chuan min râp deuh phah hial rêng a ni. Mahse, ka Patea hian mi han kâwm thiam khawp a. Ka Patea hi fiamthu duh tih takah uang thuang deuh hian hla mak deuh deuh te hi min sakpui a kan in top floor-ah te Woofer-ah hla ring deuhin kan play a kan zai chiam ṭhin a. Ka hlim ṭhin hle a ni, a hma zawngin ka hlim lo e ka tihna ni chuang lo a mahse, ka hlim a ni. Ka MetalHead chunchângah te pawh hian ka chêt Setanic châng te hian ṭawngkam dam tak hian min zilh ve fo ṭhin bawk a mahse, hei hi chu a sâwt mawh ve ang reng. At zualpui a reh a ka ziaawm ve mai zâwkin ka hria. (Ka inthawi hman lo hlauh a hehe).
Exercise lam maw?
Kei hi chu ka lian ve hrim hrim a ka piantirh aṭangin tun thleng hian ka rualpui te bulah ka lian fâl nalh zel a, a thlawna Malsawmna ropui tak ka dawn a ni. Chuan, hrisel taka pa Lian hmelṭha(hehe) tak ka nih zel theih nan ka nu leh pate’n Gym min hit-tir a nih kha. Kum 2021 kumtir lam a nia March thla ni ta in ka hria, Covid boruak ziaawm dawna kan hriat chhoh lai a ni bawk a. Ka Patea hian Pu ChamChaka Gym-ah min hruai a kâr 1 vel kha chu nutling lo kal ve ho nen Cardio room-ah ka han zuang ve zak zak a, ka rawl thei lutuk hi nuih pawh ka nui thei lo ka âwm a na tlat zel a, kha tak kha ka Patea nuih tiza zualtu ni leh tlat pek a. Kar 1 hnu chuan ka Gym coach-in, “Next week aṭang chuan weight kan chawi ve tawh dawn nia,” a ti a, ka phûr ve tawh nen Lockdown ṭul leh ta sia tun thlengin ka sek tâk loh phah (mahse, Gym fee ka pe hman lo hehe). Lockdown ni rawh sek sek, ka Patea VLTF member alawm a nih le, kan pahnihin zan Curfew zawhah Badminton Hall-ah kan inkhelh theih phah tlat a keima tâwkah ka fit phah bâkah kan Pafa bond a ngheh phah sauh a, ka hlim ṭhin a ni.
Ekhai!
Vawi 1 chu ka pi hian Bawnghnute semtu hi thlai chin nan Bawng ek a lo dil a bawnghnute semtu chuan a lo “aw” ve mai bawk a. Tukṭhuan ei kham chuan ka Patea nen Bawng ek la tur chuan kan kal a Cement bag ruak 5 lai kan keng tel bawk a mahse, Bawnghnute semtuin, “Khuti lai lawkah khuan kan Bawng in chu a awm a, hnai tê a ni,” a tih chu veng mawng râpthlak lutuk ah kan zuk hmuchhuak ta nih kha, heta chin hi kuthnathawktute’n, “Khuti lai lawk khu,” an tih hi kan ring leh tawh ngai lo. Cement bag ruak 5 keng kha bag 2 kan hawn thei ṭawk a ni e. A hunlai khan hah viau mah ila tunah chuan lung tilengtu mai a ni ta.
Ka nâwi ang anga min nâwipui ṭhin rual hian ka khawvel thlir dan leh harsatna hmachhawn dan min zirtirtu a ni ang lawi a, ka va vannei si êm. Mahse, ani pawh mihring ve tho a ni a, ama ṭawngkam takin a hringnun zinkawngah hian “chhiar fuh loh fê fê” chu a nei ve ngei a. A mihring nih ṭhin a phâk loh châng a tam ta a chu chuan kan bond thlengin a nghawng a. Tawngkam inhelhsak châng a awm ta zeuh zeuh a chu chuan lungawilohna a hring a lung a dam hlei thei lo a, tun hma anga hun hman a awm thei tawh lo. Ka rilru a hel ta tlat.
Ni 17, June, 2026, zing dar 5-a ka Patea’n a tâwp nâna thawk a han la hrâwk erawh min tidanglam chiang hle a ni. Ka Patea a nihna anga min hmangaihtu, ka nu leh pate awm loha an aiawhtu, min hrethiam ber ṭhintu kha vawi 1 a petek a kei chuan ka lungawilohsan a, vawi 1 tal pawh ka ṭawngṭainaah kei chuan ka hre lo a ka hel tlat a mahse, ka tlai tawh a ni. Ngaihdam dila kun zantin ve tho hian ngaihdam loh ka thlang a chu chuan inchhirna namen lo mi siam ta a ni. Ka thinur chu ni in a tlâkpui a ngaihdamna ka hmanhmawh duh lo a tunah inchhirna bâk chan ka nei lo. Ka Patea leh Pathian chungah pawi ka va khawih nasa êm, ngaihdam ngai zawk ka lo ni reng mai. Ka va han â tak êm!
Ka chunga i ṭhatna leh min hmangaihna zawng zawngte hi ka rûl lêt thei tawh dawn lo che a kei chuan mahse, engkim avangin ka lawm e, ka harhchhuak tlai êm a min ngaidam dawn nia. ‘Thihna lui piah Khawpui mawi’ ah chuan kan inhmu leh dawn nia.
Mangṭha le, Pate!
Han thlir lêt duai ila, kum 2012 khan ka pa bulah hian,”Pa, ‘Pate’ ti a koh tur hi ka duh ve e,” ka tia, ka Pa chauh ni lo, Pathian paw’n ka duhzawng chu a lo ngaithla ve a ni ang e Sihphir lam aṭangin ka pa cousin chu a zirna chhunzawm turin kan chhungkua min rawn zawm ve ta hlauh mai. “Pate” ti a koh tur ka han nei ve ta chu ka lawmzia kha aw! Mahse, hetih lai hian ka ko zak tlat pek a.
Hun a kal leh deuh a kei pawh Pathian zârah Class-X ka pass hnu chuan Lunglei lamah Higher chhunzawm turin kan in pui lamah ka insawn phei ve ta a. Ka Patea nen pawh han inkawmna hun ṭha zâwk te kan nei thei a. Ka Patea hi ka tân he’ng ka hun tawn hrang hrangah hian ka tân ṭhian ṭha nih a tling a Pa ṭha tak nih a tling em em a mahse, tun hnuah ka hrethiam pha ve chauh chu a ni si a.
Guitar ka han atchilh tak tak kha chu!
Atchilh tawh pe na thei deuh mai hi ka ni a. Kum 2020 kha ka ât vanglai a nia ṭhian kâwm loin chhungte te bulah pawh hun hmang tam chuang si lo khan pindan lamah ka Guitar nen hian kan inkâwm nilêng ṭhak ṭhak mai kha a nia. Chuta kârah ka inla MetalHead tel ve khanglang a chhûngte ṭhenkhat leh ka ṭhiante ṭhenkhat phei kha chuan min râp deuh phah hial rêng a ni. Mahse, ka Patea hian mi han kâwm thiam khawp a. Ka Patea hi fiamthu duh tih takah uang thuang deuh hian hla mak deuh deuh te hi min sakpui a kan in top floor-ah te Woofer-ah hla ring deuhin kan play a kan zai chiam ṭhin a. Ka hlim ṭhin hle a ni, a hma zawngin ka hlim lo e ka tihna ni chuang lo a mahse, ka hlim a ni. Ka MetalHead chunchângah te pawh hian ka chêt Setanic châng te hian ṭawngkam dam tak hian min zilh ve fo ṭhin bawk a mahse, hei hi chu a sâwt mawh ve ang reng. At zualpui a reh a ka ziaawm ve mai zâwkin ka hria. (Ka inthawi hman lo hlauh a hehe).
Exercise lam maw?
Kei hi chu ka lian ve hrim hrim a ka piantirh aṭangin tun thleng hian ka rualpui te bulah ka lian fâl nalh zel a, a thlawna Malsawmna ropui tak ka dawn a ni. Chuan, hrisel taka pa Lian hmelṭha(hehe) tak ka nih zel theih nan ka nu leh pate’n Gym min hit-tir a nih kha. Kum 2021 kumtir lam a nia March thla ni ta in ka hria, Covid boruak ziaawm dawna kan hriat chhoh lai a ni bawk a. Ka Patea hian Pu ChamChaka Gym-ah min hruai a kâr 1 vel kha chu nutling lo kal ve ho nen Cardio room-ah ka han zuang ve zak zak a, ka rawl thei lutuk hi nuih pawh ka nui thei lo ka âwm a na tlat zel a, kha tak kha ka Patea nuih tiza zualtu ni leh tlat pek a. Kar 1 hnu chuan ka Gym coach-in, “Next week aṭang chuan weight kan chawi ve tawh dawn nia,” a ti a, ka phûr ve tawh nen Lockdown ṭul leh ta sia tun thlengin ka sek tâk loh phah (mahse, Gym fee ka pe hman lo hehe). Lockdown ni rawh sek sek, ka Patea VLTF member alawm a nih le, kan pahnihin zan Curfew zawhah Badminton Hall-ah kan inkhelh theih phah tlat a keima tâwkah ka fit phah bâkah kan Pafa bond a ngheh phah sauh a, ka hlim ṭhin a ni.
Ekhai!
Vawi 1 chu ka pi hian Bawnghnute semtu hi thlai chin nan Bawng ek a lo dil a bawnghnute semtu chuan a lo “aw” ve mai bawk a. Tukṭhuan ei kham chuan ka Patea nen Bawng ek la tur chuan kan kal a Cement bag ruak 5 lai kan keng tel bawk a mahse, Bawnghnute semtuin, “Khuti lai lawkah khuan kan Bawng in chu a awm a, hnai tê a ni,” a tih chu veng mawng râpthlak lutuk ah kan zuk hmuchhuak ta nih kha, heta chin hi kuthnathawktute’n, “Khuti lai lawk khu,” an tih hi kan ring leh tawh ngai lo. Cement bag ruak 5 keng kha bag 2 kan hawn thei ṭawk a ni e. A hunlai khan hah viau mah ila tunah chuan lung tilengtu mai a ni ta.
Ka nâwi ang anga min nâwipui ṭhin rual hian ka khawvel thlir dan leh harsatna hmachhawn dan min zirtirtu a ni ang lawi a, ka va vannei si êm. Mahse, ani pawh mihring ve tho a ni a, ama ṭawngkam takin a hringnun zinkawngah hian “chhiar fuh loh fê fê” chu a nei ve ngei a. A mihring nih ṭhin a phâk loh châng a tam ta a chu chuan kan bond thlengin a nghawng a. Tawngkam inhelhsak châng a awm ta zeuh zeuh a chu chuan lungawilohna a hring a lung a dam hlei thei lo a, tun hma anga hun hman a awm thei tawh lo. Ka rilru a hel ta tlat.
Ni 17, June, 2026, zing dar 5-a ka Patea’n a tâwp nâna thawk a han la hrâwk erawh min tidanglam chiang hle a ni. Ka Patea a nihna anga min hmangaihtu, ka nu leh pate awm loha an aiawhtu, min hrethiam ber ṭhintu kha vawi 1 a petek a kei chuan ka lungawilohsan a, vawi 1 tal pawh ka ṭawngṭainaah kei chuan ka hre lo a ka hel tlat a mahse, ka tlai tawh a ni. Ngaihdam dila kun zantin ve tho hian ngaihdam loh ka thlang a chu chuan inchhirna namen lo mi siam ta a ni. Ka thinur chu ni in a tlâkpui a ngaihdamna ka hmanhmawh duh lo a tunah inchhirna bâk chan ka nei lo. Ka Patea leh Pathian chungah pawi ka va khawih nasa êm, ngaihdam ngai zawk ka lo ni reng mai. Ka va han â tak êm!
Ka chunga i ṭhatna leh min hmangaihna zawng zawngte hi ka rûl lêt thei tawh dawn lo che a kei chuan mahse, engkim avangin ka lawm e, ka harhchhuak tlai êm a min ngaidam dawn nia. ‘Thihna lui piah Khawpui mawi’ ah chuan kan inhmu leh dawn nia.
Mangṭha le, Pate!